小白觀點:街景地圖多過癮嘢睇

Google街景地圖推出嗰時，有人擔心會引起私隱爭議，依家卒之爆出單杰撻撻，事關截取咗唔少冇加密處理嘅無線網絡訊息，聽講話收埋好多個人私隱。其實大家又唔使大驚小怪，依家個個都拎住部手機周圍影post上網㗎啦，邊有私隱可言㗎，即使Google唔洩露，公僕都成日將機密資料亂咁掉，特警成可能未必夠三山五嶽嘅黑道大哥清楚警方臥底資料。

不過有時悶悶哋都幾好玩，好多過癮嘢睇，有個黃色招牌冇遮冇掩標明「×佳麗」，明碼實價；由於剪接問題，周不時又見有半截身周街行，都咪話唔驚。街景地圖話就話人面同車牌號碼會模糊處理，台灣有個女人輕倚窗邊，樣有打格，不過佢胸前兩舊肉就冇嘞；仲有個巴士車身廣告，上面有個以一句「省姐撚，撚呔撚」令人讚不絕口嘅男星相，咪一樣冇打格，唔通普通話講得叻可以豁免？

Blog:http://sunsiupak.blogspot.com

阿豪觀點:港人被洩密訓練有素

Google搞嘅立體地圖確係幾過癮，但係原來佢哋嘅街景拍攝車過去四年喺全球各地拍攝期間，意外經WiFi收集咗未經加密嘅個人資料，Google方面已經承認出錯同埋道歉，並且應承盡快刪除所有數據。

今次真係好笑喎，乜Google唔係強調「不作惡」嘅咩？之前仲好高調咁撤出內地市場㗎喎，依家轉過頭原來一直侵犯緊大家嘅私隱，真係令人幾失望。依家最大嘅問題係，點樣保證Google冇亂用蒐集得嚟嘅資料呢？話晒四年已經過去，點解到家陣先至揭發出嚟呢？

呢單嘢影響範圍廣泛，全世界好多城市都中招。其他地方啲人反應係點豪伯就唔知，但係我估喺香港都係不了了之，事關香港人私隱被侵犯都慣晒啦，無論係警方定醫管局，都經常發生洩密事件，小市民一早已經訓練有素，畀人睇吓電郵，都係好閒嘅事啫！

Blog:http://lukchiho.blogspot.com

網友觀點

谷　氣：谷歌不滿內地黑客竊取電郵，佢哋咪又係侵犯緊人哋私隱！

懵盛盛：港府冇厘醒目，對市民不利嘅嘢總係由外地發現……

周　　仔：政府應該要重視呢單嘢，因為關乎好多市民嘅私隱。

大驚小美：Google要亂用嘅話，全球咁多用戶資料都可以亂用啦。