話說日前有個地盤工人被鐵釘拮傷手臂，流咗唔少血，佢下午兩點幾自行去沙田威爾斯親王醫院急症室求診，點知等咗十一粒鐘，到凌晨一點幾仍未就診，期間仲索性返屋企食完晚飯再嚟等過。

有位吳女士仲谷氣，佢未足兩歲嘅BB女唔小心跌倒，撞傷後腦，佢即刻帶去威院急症室求診，點知畀護士分流列為非緊急個案。咁細嘅BB女跌親個頭，可大可小o架，吳女士向資深護士投訴，弊在佢急人哋唔急，對方一味叫佢耐心等候。卒之等呀等，等咗六粒鐘，到凌晨四點先見到醫生。叮，莫講話跌傷嘅係BB女，就算係大人，咁樣等法都隨時出事啦！

查實，威院呢種亂象，喺任何一間公立醫院急症室都可以睇得到。曾經試過有病人等得唔耐煩，起哄鼓譟，搞到要報警，可惜警察都幫唔到o架，最多咪叫病人耐心等候。正如有醫學界人士話齋，如果急症室一兩日係咁仲可以接受，長期咁就唔正常，要檢討吓係咪管理出咗問題。

話時話，公立醫院唔正常，已經唔係一、兩日嘅事，而係陳年舊事，但幾時見醫管局檢討過吖。急症室咁墟冚，其實一字咁淺，咪就係因為醫護人手唔夠咯，例如威爾斯醫院咁，一日到黑都有過百病人等睇急症，但一個鐘只可以睇三個病人，唔亂至奇。更奇嘅係，就算半夜三更，輪候求診亦需要九粒鐘，簡直係天方夜譚。

醫管局可能會話，冇辦法啦，病人愈嚟愈多，當然要慢慢等啦。冇錯，病人係唔少，問題係，既然知道病人咁多，當局點解唔增撥資源、增加人手呢？醫管局每年有幾百億元經費，適當增加急症室人手，唔係咁都做唔到吖嘛！

更搞笑嘅係，醫管局不單止唔肯增撥資源，反而成日話市民濫用急症室。請問，嗰個未足兩歲嘅BB女跌傷後腦，去急症室求診，唔通亦叫做濫用？嗰個被鐵釘拮傷嘅地盤工人，係咁流血，睇急症又算唔算濫用吖？

講到尾，急症室日日排長龍，根本唔關市民濫用，而係當局縮骨，唔肯增加資源，咁搞法，急症室變咗慢症室，日後市民睇急症，豈不是要先預約，然後輪候幾個月至睇到醫生？叮！