小白觀點：唔識揸羅庚點鬥？

風水師為咗雞毛蒜皮嘅小事搞到要對簿公堂反目互片，本欄覺得無謂之餘，亦都有違風水師鬥法嘅原則。記得細個喺飛髮舖睇睇埋埋好多賴布衣風水奇聞，以前啲風水師鬥得好專業，你埋個公仔喺門口，佢就放個妖物喺橫樑，不過依家香港嘅所謂風水師，唔好好地學巒頭理氣，拎住羅庚都分唔到東南西北，點識設風水局玩殘對手吖。

聽聞香港都打過一場風水大戰，有某間大廈特登起到三尖八角，成把菜刀咁，好多人以為只不過係醜啫，嘩，原來煞氣勁囉，連殖民地最高領導都擋唔住，喺北京兩腳一伸駕崩。江湖傳聞，英國人唔敢唔信邪，立即搵高人喺港督府布個局擋煞，所以後尾有個姓董嘅，打死都唔肯入去住，算佢都懵唔晒㗎。咦，咁因乜事依家嗰位又唔怕呢？哦，簡單到極，佢老哥係港英餘孽吖嘛，不知幾咁如魚得水添呀！

e-mail：sunsiupak@gmail.com

Blog：http://sunsiupak.blogspot.com

阿豪觀點：不如測恒指分勝負

兩大風水師反目，呢單嘢其實好有趣，誰是誰非當然好難喺度評論啦，但係計我豪伯話齋，要驗證一個風水師準唔準，與其由個官判，不如科學化啲，叫佢哋預測一下一個月之後嘅恒指，以最貼近實際水平嗰個為勝方咪得囉……

不過咁，正如網友所講，風水師好可能會避戰，講埋晒啲模棱兩可、似是而非嘅說話，同一般股評人冇乜分別！

不過講到風水師捉人心理嘅技巧，又的確係高。嗱，大家諗吓呀，去得求卜問卦嘅，梗係擔心自己嘅前程啦，喺呢個時候，風水師不妨有咁嚴重講到咁嚴重，又話死人又話冧樓，總之有咁誇張得咁誇張、嚇破對方個膽，係呢個時候，大師當然要氣定神閒咁醒個客兩招：嗱，只要你喺向南嘅窗口放盆鐵樹咪得囉，結果對方冇事冇幹，你咪變咗生神仙囉！

e-mail：lukchiho75@hotmail.com

Blog：http://lukchiho.blogspot.com

網友觀點……

風水B：告到上法庭，睇嚟風水界都需要河蟹。

哨牙佬：年尾例必大鬥法，勁印運程書鬥吓邊個最發！

賴布衣：啲風水師係有計，成日都見佢哋上頭版做新聞人物。

盲公炳：競爭大要諗計，外形談吐鬥出位，各出奇謀搶客仔。

有料爆：

放工都係買番張木櫈，坐得安心啲。

SMS傾埋一份：6016 2496