呢排社會上好大聲音要求復建居屋，煲呔曾被逼埋牆角，上星期四託詞諮詢五個月再決定，擺明想拖。煲呔曾想金蟬脫殼，無殼蝸牛嘅升斗市民點會放過佢。而行政會議召集人CY梁振英尋日更發表數千字鴻文，力指政府有責任協助市民置業，矛頭直指對復建居屋態度曖昧嘅煲呔曾，至於CY嘅動機係為市民抱不平定另有其他目的，咁就要問佢本人至知嘞。
呢篇名為《樓市和住房》系列之五，羅列大量數據力撐復建居屋，反駁富貴黨常委田北辰嘅「公帑助居屋戶致富」論更加句句有骨，CY話政府以前夠為廠家推工業廉價地啦，有乜唔妥先？明寸廠家出身嘅田二少。
CY同政府唱對台早有前科，○八年佢搶閘宣布工資保障運動失敗，力撐最低工資立法；早前批評指復建居屋會令樓價大跌嘅人係「住喺火星」，矛頭直指運輸及房屋局局長鄭汝樺，引起好大回響，所以佢尋日追打煲呔曾都唔算係乜嘢新聞囉。