15/05/2010

政情:肥亨拍拖到正生打氣

商務及經濟發展局前局長馬時亨曾經喺電台節目中為正生書院學生流下男兒淚,而佢一直想探訪班學生。前日有讀者報料,話見到肥亨同太太Linda王培琪搭離島渡輪到長洲,再坐駁艇到正生書院,就喺當日下晝三時幾,果然喺中環港外線碼頭外見到肥亨兩公婆蹤影,佢哋啱啱坐船返嚟,全程由正生書院校長陳兆焯送行,當時除見到肥亨兩公婆外,仲有肥亨妹夫廖先生同外甥廖智亨等四人等候座駕。

今次肥亨探訪正生學生相當低調,莫非陳兆焯就遷校梅窩問題搵佢幫手?非也!肥亨澄清,陳校長只係想佢親身睇吓正生學習環境,為學生打打氣。

肥亨當日同百幾個學生會面傾偈,發覺所有學生都好有紀律,學識好多技能,完全睇唔出犯過事,而且大部分都改過自新。不過,佢覺得正生學習環境好差,校舍簡陋唔在講,隨時仲會冧大石,好需要新校舍;但佢話無論正生搬去邊,都要由正生自行同政府協商。佢又慨嘆話:「我以為自己細個屋企貧窮無洗手間啫,估唔到現家咁繁榮都有環境咁差嘅學校,完全無法想像會係咁,睇到都唔開心!」佢又話正生學生嘅刻苦生活,外甥睇完都有所得着,慶幸冇誤入歧途而要感恩,明白幸福非必然。