新界社團聯會為慶祝創會廿五周年，尋日喺元朗大球場舉行「感受高鐵之旅」啟動禮，會長張學明致辭時介紹主禮嘉賓煲呔曾出場，竟然開口就話：「尊敬嘅董特首！」在場人士聽得一清二楚，但佢冇即時更正，似乎未自覺講錯嘢，台上嘅煲呔曾就強顏歡笑。致辭完畢後，張學明返回座位後即與鄰坐嘅煲呔曾咬耳仔，唔知係咪知錯沙冧。
大清早噏錯嘢，一係未瞓醒，唔係就相當邪門。煲呔曾無心戀戰等退休，懶理施政劣迹斑斑，早已不得民心；大家咁順口叫錯佢做「董特首」，莫非係暗示佢將會步老董後塵，腳痛提早落台？加上仲係出自建制派核心嘅口中，睇落就更加玄妙嘞！
其實早兩年前喺黑龍江舉行嘅經貿合作交流會上，負責主持嘅黑龍江省常務副省長杜家毫，錯誤將煲呔曾稱為「董特首」，要由旁邊嘅人提醒後，先更正為「曾行政長官」。
稍後香港貿易發展局主席蘇澤光喺一個國家改革開放三十年嘅大型研討會上，亦將煲呔曾講成「尊敬嘅董特首」，見台下爆笑先更正為「董副主席」，其後又補鑊再講煲呔曾及老董「兩位都係特首」。近嘅喺上星期立法會答問大會，白鴿黨李永達提問房屋政策時亦有意無意將煲呔曾稱為「董特首」。煲呔曾應該心知發生乜嘢事。