為喚醒青少年關注吸毒禍害，香港女童軍繼早前搞咗場大匯演後，近日再推出「無毒新SING」歌詞創作比賽，邀請女童軍同全港市民發揮文采填吓詞，今次仲會搞Crossover，搵嚟港區全國人大代表王英偉囝囝、「樂壇新人王」王梓軒為比賽作兩首曲，世界級大提琴家李垂誼就以琴聲演繹得獎作品。
比賽由中華總商會會長蔡冠深太太蔡關穎琴牽頭搞，佢係女童軍港島地方協會會長，本身熱愛唱歌劇，深明音樂可以陶冶性情呢個道理，佢話填詞有助啟發創意，鼓勵父母同子女合力填番首歌參賽，好過攞住藤條說教。
佢有份做比賽最後評審，仲提供致勝竅門話，得獎作品一定要貼題，歌詞配合旋律，贏面就自然高好多喎。比賽已開始接受報名，月尾截止，要提交作品就快手嘞。