月初履新做運輸及房屋局常任秘書長（房屋）兼房屋署署長嘅栢志高，話首要工作係同各界溝通，但首要面對一大挑戰，首先要重溫學過嘅廣東話。自從○六年被派去歐洲工作後，栢志高嘅廣東話已經丟淡，依家要加緊學習，枱頭就放咗一疊粵語拼音筆記。原來我哋學英文首先要學音標，而外國人學廣東話都係要學粵語拼音，其實學嘢方式都係差唔多。
喺佢未坐暖嘅辦公室入邊，發現冇咗張會議枱，佢話打算將自己嘅傢俬搬嚟，令辦公室感覺輕鬆親切啲，而喺牆上就掛咗一幅經典國畫同一幅現代西洋畫點綴下，旁邊就擺咗兩個趣致嘅陶塑小童像。
喜好方面，佢話鍾意欖球同埋品嘗美酒佳餚。佢有三個仔女，所以好關心小朋友嘅健康成長，自從兒童心臟病基金會喺九五年成立後，佢做咗主席十年，直至幾年前派駐海外先卸任。