台灣駐港機構之一光華新聞文化中心新任嘅主任羅智成，尋日應台灣工商協會及國際華商協進會邀請，首次處男演講，見佢又好似黑衣人咁，黑色Polo恤襯黑色西褲，同早前見到嘅佢打扮一模一樣，同嚟聽演講嘅西裝筆挺男士形成鮮明對比。
羅智成笑住話屋企只得黑色衫褲，冇其他顏色，好似着緊嗰件恤衫可能有超過二十件都唔奇！原來佢保持咁嘅形象已超過二十年，仲自嘲鍾意扮到好似影子咁樣，哈哈！
雖然佢嘅形象只得一種顏色，但生活同埋思想卻色彩繽紛。佢同大家分享《文創時代的野性思維》，主旨係教大家玩多啲，唔好成日工作；仲話若然將來有大學開辦「玩耍系」，甚至有「玩耍學院」，肯定係先知。佢覺得依家人類生產過剩、知識過剩，但就有過多焦慮同壓力，係時候尋求心靈上嘅新陳代謝喎，而佢最鍾意去旅行，即使冇得去，都會隔段時間就去屋企附近嘅酒店住幾日，令自己有出埠嘅感覺。
佢呢番天馬行空嘅「偉論」氹得台下聽者一陣陣爆笑，連台灣工商協會會長江素惠都笑住話聽完演講後就會執咗間公司，一於旅行去矣！