15/05/2010

播放本新聞相關短片

政情:投唔投票五散人各自表述

聽日就係立法會補選投票日,煲呔曾同班問責高官一直龜縮唔肯面對現實,無論記者點問都淨係識得揮手同騎騎笑,拖到尋晚十點半終於發新聞稿宣布唔會投票,但反觀班立法會議員,繼建仔、工聯會同富貴黨等建制派擺明車馬唔投票,立法會內嘅獨立議員亦逐步開始表態,但「五散人」竟然有五種態度,真係好散喎!

大輝:士兵殺敵天經地義

「五散人」之一嘅廠商會代表林大輝日前話今次選舉既嘥錢又唔自然,絕對唔會投票,佢用打仗嚟做例子,話大家都知殺人唔啱,但如果係國難當前,士兵喺前線為國殺敵就變得天經地義。佢仲話今次補選其實都係差唔多,雖然公民教育係教大家選舉要投票盡公民責任,但如果一件事本質已經係錯,大家就冇需要喺一個錯誤基礎上,不斷糾纏所謂責任或投票嘅問題,仲話大家只要諗得通呢個道理,決定投票與否就好容易,唔明點解煲呔曾要拖咁耐都唔表態喎!

大輝就表咗態,咁其餘四散人又如何?作為「隱形黨鞭」嘅保險界陳健波話佢一早已經諗掂去唔去投票,但佢話唔想因為個人決定影響到其他人,決定封口唔講,希望大家可以體諒咁話。

醫學界「怪醫」梁家騮就話自己有七成機會唔投票,到時嗰三成會唔會忽然跑出,應該就要睇聽日嘅天氣同怪醫心情嘞!會計界「波波」陳茂波就話仲掙扎緊唔去投票定係去票站投白票,諗多晚應該就可以落決定。

資訊科技界代表「IT豪」譚偉豪都話覺得呢個問題搞到佢好頭痕,最簡單就係睇兄弟辦事嘞!如果四散個個都唔投票,佢都唔會去做「黑羊」喎!

五散人之前表明一齊合作,但議會內投票就各自表述,估唔到今次連選舉投票都各有各講法,其中四散仲係曖曖昧昧兼隱晦,唔知為乜?不過聽佢哋嘅語氣,相信最後都係殊途同歸嘞!即係點?看官自己咀嚼吓啦!