食物及衞生局局長周一嶽尋日書面向立法會解畫,話醫管局○八至○九年度向大約九萬名病人處方自費藥物,佔醫管局病人總數約百分之三。佢又吹水話,截至○九年底,當局以撒瑪利亞基金為安全網,向冇錢買自費藥物嘅病人提供全數或部分藥費資助,共有七百幾位醫管局病人受惠。
叮!每年有九萬名公立醫院病人被要求自費買藥,政府自己唔做嘢,搵撒瑪利亞基金做所謂「安全網」,但受惠嘅病人得幾百個咁大把。就算醫管局好似周一鑊所講,以成本價向病人提供自費藥物,都係嘥氣。家陣愈貴愈有效嘅藥,愈有可能被列入自費項目,呢幾萬人好多因為財力所限買唔起而放棄服藥。
呢,有團體調查發現,三成七受訪嘅公立醫院專科病人並冇按醫生建議購買自費藥物,當中有九成二人係因為冇錢焗住放棄。就算死慳死抵買咗藥,有病人都覺得按醫生建議服用太「奢侈」,居然將一粒藥丸分兩次或者隔日食。咁樣「慳住食」,療效必然大打折扣。
年過七旬嘅魏先生患黃斑病變,醫生話要注射至少六支、共四萬幾蚊嘅針劑自費藥物至可以控制病情,減慢致盲速度。對於打份兼職工,月入只有三千幾嘅魏先生,呢筆錢簡直係天文數字:「負擔唔到,索性放棄唔睇。」因為冇及時治療,情況轉差,家陣隻左眼已經失明。
叮!有病冇錢買藥,睇咗病等於冇睇,當局設嘅「安全網」發揮唔到應有嘅作用,咁荒謬嘅事只會喺周一鑊轄下嘅香港公共醫療系統至可能發生。為咗縮皮,班醫療高官幾乎「不顧一切」,完全當病人權益冇到。
唉,呢個政府縮骨出晒名,就算係派長者醫療券畀老人家,每年都只係得嗰二百五十蚊,睇得傷風醫唔到咳,都唔知派嚟做乜,咁寒酸不如唔好派啦。
更離譜嘅就係,當局話撥一千二百幾萬資助老年黃斑病變病人,但試用嘅原來係未註冊嘅腸癌藥,連動物測試都未做過。咁嘅做法,同攞病人嚟做白老鼠,搵佢哋條命較飛有乜分別?
病人分貴賤,冇錢冇得醫。計太一叮話齋,醫管局藥物名冊根本係將窮人打入另冊,搞到佢哋連病都唔敢病。旨意呢個政府幫低下階層排憂解難,直頭係問和尚借梳,盞嘥氣啦。叮!