立法會五區補選禮拜日就投票，公文袋同社民連五子玩完辭職後，有冇得重回議會好快揭盅，不過，即使佢哋可以重返議會，都難免畀人小懲大誡，事關建制派醞釀阻截五人重返原先坐開嘅重要委員會，以及重掌事務委員會副主席位置，費事等人以為可以自出自入。
議會內「迎新」活動據講會源源而至，五子中原本有兩人係帳委會委員，辭職後由兩名泛民議員頂上，本來講明補選過後再掉轉，不過，帳委會主席黃宜弘尋日話咁做有問題，因為帳委會已就第五十四號審計報告展開聆訊，預計七月休會前交報告書，兩名泛民「臨時工」冇理由話走就走，到時份報告點寫呢？所以返嚟嘅人都冇得再做。
另一個重量級小組係雷曼小組委員會，原本辭職嘅一人係成員，前日有關小組開閉門會議討論，暫未有結論。但有建制派成員擔心小組涉及特權法，重返嘅人未必熟書，所以大家都傾向唔贊成佢回歸。其他小組亦可能涉及呢啲問題，所以玩辭職騷都要付出代價。