哦，原來佢咁想離開生產力促進局，不惜做緊生促局行政總裁時寄信搵工，原因係乜？Wilson梗係唔會主動講，不過，佢做生促局期間同勞方搞得不愉快，甚至同主席陳鎮仁都理念未必相近，蟬過別枝都好正常。

講到新工，Wilson透露，自己早年喺政府時曾負責航權談判嘅工作，不時代表香港同外國傾航權問題，甚至離開政府前，都喺經濟科負責有關機場嘅研究，對航空工作可謂有相當豐富嘅經驗，相信機管局都係睇中呢點先請佢。佢仲話，做咗咁多年有關機場嘅工作，佢對航空唔多唔少都有啲情意結，所以都幾期待返新工。

政圈口痕友就話，Wilson呢份工雖然係靠自己搵嘅，但如果唔係喺政府嘅歷練，佢都未必做到呢份筍工啦。而且，佢九○年調去經濟科仲係AO仔，即使參加航權談判，都係做啲支援工作啫，當時主導航空談判嘅係攞命陳呀。