英國大選結束，保守黨黨魁卡梅倫（David Cameron）擊敗白高敦，尋日正式入主唐寧街十號首相府，隨即着手組織新政府。英國政局大變，保守黨捲土重來，卡梅倫同窗奧斯本（George Osborne）出任財政大臣，疑似特首參選人、行政會議召集人梁振英（CY）尋日喺網誌話，佢同呢位英國新財政大臣曾有過一面之緣。
CY透露，兩年前佢喺英國曼徹斯特出席一個由保守黨搞嘅華人新春酒會，當時正係由奧斯本代表保守黨參加，CY仲有幸喺個酒會上同奧斯本先後發言添。
佢仲話，卡梅倫同奧斯本都十分年輕，卡梅倫只得四十三歲，係英國近二百年嚟最年輕嘅首相，而現年三十八歲嘅奧斯本亦係英國一百二十五年嚟最年輕嘅財政大臣。
講完一輪，CY都冇乜結論，到底佢係拉關係，定係感嘆政壇係年輕人天下呢？