本文重點
愛美再唔係女人嘅專利，白鴿黨立法會議員李華明早排先做完去斑治療，近日就輪到黨友張文光。張文尋日現身立法會時，右邊面上貼咗一塊藥水膠布，唔通佢朝早剃鬚刮損塊面？唔係，佢透露早兩日去咗做激光去斑，傷口未好番，所以要貼膠布。
太座：靚仔啲就整啦
點解張文要去斑呢﹖佢話右邊面中間位置有一撻黑斑，前排一位醫生朋友同佢講，呢啲黑斑會愈嚟愈大，建議佢用激光去斑，張文轉過頭徵詢太座嘅意見，張太話如果佢去斑之後靚仔啲，就整啦！就係咁，張文就做咗議會第二個貪靚去斑嘅男人。
過程痛唔痛呢？張文話成個過程只不過係幾分鐘，一啲感覺都冇，遲多一、兩日就可以搣走膠布，希望靚晒啦。
至於價錢，佢點都唔肯講，只係話操刀者係朋友嚟嘅。係咪早排幫李華明去斑嘅史泰祖醫生呢？張文笑笑口咁話：「唔好問我呢個問題啦！」