男士時裝雖然唔及女裝咁多變化，但係好多城中名士都鍾意被譽為職場上非常得體嘅意大利品牌Giorgio Armani。據講，中環男士上班族嘅衣櫃內，至少擁有一套Armani西裝。成日喺立法會出入嘅林健鋒（Jeffrey）都話，佢最愛Armani西裝款式夠穩陣。
身為玩具廠老闆嘅Jeffrey，平時成日見客，西裝骨骨已成指定上班衣飾。尋日佢揀咗一套直條Armani西裝，配紫紅色Hermes領呔同TOD'S皮鞋現身立法會。
Jeffrey迷上Armani有原因，佢話西裝剪裁最緊要啱身，Armani西裝做工同布料都展現一流品質，正合佢心意。雖然佢衣櫃有唔少其他品牌西裝，但遇上重要場合，Armani仍然係不二之選。