本文重點
科技大學校長陳繁昌上任後好快融入學生群，箇中秘密原來係以運動打破彼此隔膜。唔講唔知，陳繁昌係一名運動健將，足球、網球都好耍家，佢由中學至大學都係足球隊成員，中學時仲攞過校際賽冠軍添；至於網球，佢話幾十年前網球仲係一項貴族運動，香港冇乜網球場，到去美國讀書先開始學打網球，一打就愛上。
定期約師生打網球
科大宿舍今年重點推廣跳繩，負責推廣活動嘅同學尋日喺校園宣傳，特登喺午飯時間搵埋陳校長喺學校大堂跳大繩，希望上行下效，將勤做運動嘅風氣傳遍校園。陳校長跳起繩嚟有板有眼，佢透露自己平時訓練有素，讀大學時寫論文郁吓就要幾粒鐘，寫到攰攰哋，佢就會攞條繩出嚟跳吓，事關做啲帶氧運動可以增強記憶力，有時會玩埋拋波仔，等個腦鬆弛吓。
陳校長仲經常以球會友，周末約同事踢波，逢禮拜二、四、六就會同學生、教職員打網球，佢哋好有系統咁有個科大網球龍虎榜，陳校長短短幾個月就已經打上龍虎榜六至七位，出完一身汗再同師生食吓嘢、傾陣偈，自然就熟絡起嚟。