「雙曾會」疑似談話內容曝光後，立法會主席好尷尬，煲呔曾更好似畀人揭底牌咁，兩個當事人雖然各自表態，但事件並冇平息，仲炒得愈嚟愈勁。尋日，白鴿黨兵分兩路，一邊寫信畀政制事務委員會主席，要捉煲呔曾落立法會交代；另一邊則開黨團會議，決定喺禮拜五嘅泛民飯盒會上提出捉鬼。佢哋話，依家外界都指摘泛民冇品，公開原本承諾要保密嘅內容，搞到佢哋都成為嫌疑分子，為免黑狗偷食、白狗當災，最好就係捉鬼。

雙曾疑有心病開始過招

不過，泛民中人對白鴿黨第二個建議好有保留，公文袋嘅余若薇話家吓最緊要係捉煲呔曾嚟研究佢有冇施壓；職工盟嘅李卓人都話，最好佢哋再次約見主席，等主席三口六面講清楚。事件中好被動嘅煲呔曾，尋日都有知心友撰文護航，公然質疑立法會主席爆單咁嘅事件係內有乾坤，甚至涉及個人誠信，由此路入，唔難發現雙曾都有心病，甚至開始過招添。

泛民、雙曾亂成一團，睇戲都冇咁精彩，工聯會嘅王國興尋日就話泛民違反誠信，影響以後嘅溝通工作，仲話唔明點解立法會主席「咁傻咁幼稚」：「我從政都知道講嘢要小心，而且講乜嘢都預咗畀人爆出嚟，最緊要牙齒當金使，一切喺陽光之下，咁就冇有怕嘞。」