小白觀點：北上用骨灰盅當銀包

內地偽鈔集團業務愈嚟愈多元化，依家搞搞新意思，派人包咗深圳桑拿場更衣室嚟做。為乜？原來為咗乘機將客人放喺儲物櫃嘅真銀紙換成偽鈔，神不知鬼不覺，真係高招！

香港人咁鍾意北上揼骨，點樣至可以避免金錢損失呢？當然，最好嘅方法梗係以其人之道還治其人之身，銀包內一早袋定假鈔啦！之不過，呢個做法有好大風險，若果偽鈔黨發現換咗一疊廢紙返去，隨時會惱羞成怒打你一身，仲好可能賊喊捉賊，乘機報埋公安，到時話你行使偽鈔破壞國家經濟，呢個罪名可大可小㗎，唔係十五日行政拘留咁簡單！

所以呢，小白老弟喺度醒大家一條好橋，以後北上桑拿，搵個骨灰盅當銀包就算，放入儲物櫃之前，仲要煞有介事咁喺職員面前拜三拜，就算偽鈔黨有天大嘅膽，都未必敢盜墓偷龍轉鳳啩。

e-mail：sunsiupak@gmail.com

Blog：http://sunsiupak.blogspot.com

阿豪觀點：本地桑拿業天大喜訊

內地有偽鈔集團設局掉包以假換真，今次係喺港人經常光顧嘅桑拿或休閒中心更衣室作案，將客人放喺櫃內嘅真鈔換成偽鈔，去沖涼揼骨，都咪話唔提心吊膽。不過班友又係猴急咗啲，夠膽死一次過換晒啲客人嘅錢做偽鈔，梗係容易斷正啦！

呢單嘢好彩有本報幫手揭發，可說功德無量，尤其對於本地桑拿業界嚟講，更加係一個天大喜訊，無論喺夜晚賣幾多廣告，一時有個明星話「從來唔拍桑拿廣告」，另一個又走出嚟話「我拍咁多桑拿廣告，呢個最好」都冇用，點都唔及今次呢個訊息咁正面啦—嗱，留港消費，咪唔使蒙受金錢損失囉！

其實條橋唔單止桑拿業界啱用，飲食業都可以效法。商會大可以揼一筆錢，定期喺媒體賣廣告，廣告內容係內地嗰啲「水溝油」呀、「病死豬」嘅新聞，總之愈得人驚愈好，港人嚇多兩嚇，仲夠膽北上消費咩！

e-mail：lukchiho75@hotmail.com

Blog：http://lukchiho.blogspot.com

網友觀點……

賓　仔：班食腦偽鈔黨唔使好耐又會諗到散貨新招。

桑拿士：儲物櫃咁易打開，客人啲名牌物品隨時變晒老翻都唔奇！

金田一：偽鈔集團會唔會混入銀行去進行換鈔行動呢？

毒　草：若畀販毒黨暗放毒品就一身蟻喇！儲物櫃靠唔住！

有料爆：

內地又有校園血案，唔通呢家嘢都有傳染性？

SMS傾埋一份：6016 2496