呢種血淋淋嘅場面香港人都唔係第一次見嘞，遠嘅唔講，淨係過去一年當中已發生咗好多單。舊年五月，一名精神病患者喺街上斬死一名三歲細路，仲斬傷埋佢嘅父親；今年二月，一個青年懷疑幻覺發作，用菜刀斬傷自己嘅老竇；今年四月，一名有精神病紀錄嘅男子將父母塊面斬到血肉模糊。

每次出事，政府都話要反思、檢討，但事情一過咗，又當乜事都冇發生過。呢，政府又做騷嘞。曾蔭權同食衞局局長周一嶽、醫管局行政總裁蘇利民尋日齊齊出鏡，對葵盛東邨事件表示震驚、悲痛、惋惜，仲話要檢討支援精神病康復者嘅資源分配。但講嚟講去，都係想證明政府冇做錯嘢，只係程序有啲問題啫。咁叫做反思咩？擺明係卸責！

唔講好多人都唔知，原來香港共有十五萬精神病人，其中嚴重患者超過四萬人。政府嘅政策係設法令精神病康復者融入社區，仲話會安排社工或精神科醫護人員跟進。但其實政府將精神病康復者一腳踢畀社區，甩開包袱就關人個關。

嗱，疑兇曾因斬傷太太坐監，仲因打親戚、恐嚇街坊留過案底。對一個有咁多前科嘅危險人物，當局並無積極跟進。例如，疑兇連續兩個月拒絕護士家訪，護士向精神科醫生報告，醫生居然批准暫停家訪。但有專家話，精神病患者都唔會承認自己發病嘅，疑兇拒絕家訪，其實已係發病先兆，醫護人員仲矇查查。更不堪嘅係，一直到上個月覆診，醫生仲未發現問題，結果幾日後就出事。咁嘅跟進，直情形同虛設！叮！

講開又講，當局對精神病康復者嘅支援實在太縮骨，本港社區精神科護士或社工嚴重不足，平均每人要照顧七十至一百個精神病康復者，據統計，起碼要增加三倍人手先至夠。咁搞法，唔出事至奇。

近排連續爆咗咁多單兇案，政府至死死氣推出一個「個案管理計劃」，按病人嘅需要制訂護理計劃，發現有復發迹象就迅速提供治療。可惜受惠者只有五千人咁大把，難怪有區議員話係「杯水車薪」。

叮佢個鎯鎯，政府將啲精神病康復者踢畀社區，又唔肯增撥資源，增加護理人手，咪即係靠害！講到底，政府就係嗰啲兇案嘅殺人幫兇。請問周一嶽等高官，半夜諗起嗰啲死不瞑目嘅刀下冤魂，你哋瞓得着咩？