11/05/2010

播放本新聞相關短片

政情:鄭大班呻買唔起癲價樓

今年三月對高樓價提出警告,又主張復建居屋嘅滙豐中國董事長鄭海泉,尋日喺一個酒會被問起依家年輕人買唔買樓好,點知佢好勞氣咁連講幾次:「買唔起!」問佢嘅意思係後生仔買唔起定係佢買唔起?佢都係重複嗰句「買唔起」。卒之佢肯講,依家香港啲樓價咁高邊個買得起,仲話佢自己有樓都係咁話。

另外,對於市民要求復建居屋嘅呼聲愈嚟愈大,北京中信集團董事長孔丹都出到聲,話特區政府應該學內地政府調控樓市嘅手段,以賣地收入去起多啲廉價房屋,幫輕小市民嘅買樓壓力。

孔丹尋日專程來港,主持旗下中信嘉華銀行改名為「中信銀行國際」嘅盛事,同佢講起樓價問題,佢話內地樓市依家正在大調整,政府用嘅辦法就係以賣地收入去起廉租屋、經濟限價房等四種廉價屋。佢話香港有興建居屋嘅經驗,相信特區政府有能力去解決呢個問題,但係如果唔因應情況變化而復建居屋,問題都好難解決。