任亮憲當日喺訪問中承認賣咗兩層樓，一間二百幾萬，一間三百幾萬，前後確實賺咗七位數字添。此言一出，即時引起大批網民反彈，香港討論區直至尋日已有二十幾頁近四百個留言評論呢件事，當中絕大部分係批評任亮憲。網民frank_8批評話：「作為炒家，炒起個市，今日居然話樓貴，要為民請命。錢賺了，就過橋抽板，不知所謂。到樓市倒了，自己又可以乘機撈一筆。」另有網民憤言要稅局查吓佢有冇報漏稅添。

任亮憲係一家信託公司嘅聯席董事，尋日仲解釋話：「我自己做呢行，如果不善投資，好難令客人相信你有能力！」佢又自辯話私人投資同自己喺房屋議題上嘅立場冇衝突，佢建議增建公屋同復建居屋，係希望冇能力置業嘅港人有屋住，而唔係推冧樓市喎。至於事實係點，就等大家去判斷。

除炒樓外，佢仲有炒股票添！佢話今年二月確實放咗手上兩個位於港島嘅中小型單位套現逾百萬元，全數用嚟進軍股市，依家就手持滙控同中移動嘅股票嘞！