有「紡織女王」之稱嘅行政會議成員楊敏德，由商界踩入政壇後，未見有大動作，尋日出席喺理大舉行嘅「創造性經濟論壇」一鳴驚人，佢妙語連珠，自嘲有「更年期善忘症」，又呼籲理大搞家長日，扭轉家長望子成龍嘅守舊心得。
楊敏德就「蛻變中的中國經濟發展路向」發言，真係啱晒佢嘴形。佢直言中國經濟起飛，但貧富懸殊嚴重，提醒老闆要有良心，賺錢之餘，要同曾經付出汗水嘅內地廉價勞工分享成果，畀員工更佳待遇，創造雙贏局面。
做主持嘅恒隆地產董事長陳啟宗不時提出尖銳問題考佢，佢好鬼馬咁瞪大眼話：「我唔記得自己要講乜喇，呢個係更年期女人開會經常出現嘅問題。」引來哄堂大笑。囡囡潘楚穎全程喺台下用心聽，以甜笑眼神支持媽咪。
記者追問陳啟宗以重金禮聘太古中國主席陳南祿過檔恒隆做高層單嘢，佢直認欣賞對方能力高。至於點解出咁高人工挖角，佢以老闆口脗話：「佢（陳南祿）之前幾高人工我唔知，恒隆係畀開呢個人工嘅。」