霍公子話每逢有外國老友來港，都會帶佢哋去「陸羽」歎番一盅兩件，等佢哋一邊欣賞典雅古老裝潢，一邊感受傳統老派點心風味。霍公子就醫肚至上，柯打一籠叉燒包同蝦餃，回味無窮。

「陸羽」點心堅持用古法製作，材料新鮮。蝦餃皮是用白飯曬乾磨粉搓皮來做，入口有淡淡米香；叉燒包看似平平無奇，原來燒製叉燒技巧極之講究，醬料就係關鍵，要調得啱啱好。叉燒包放上客人枱上，永遠熱辣辣，一啖放入口，陣陣暖意在心頭。