毫無高見嘥公帑

立法會世博團尋日繼續第三日行程，亦即係最後一日，佢哋搭夜機返港前全力衝刺，一日參觀咗五個場館區，然後總結行程，大家以為佢哋遊咗三日，應該有大把高見，點知最後完全係兩回事，班議員只係輕輕鬆鬆介紹番一次歐盟館、英國館同美國館嘅設施。咁嘅表現畀人嘅印象覺得佢哋「知少少扮代表」，事關呢啲聽導賞員講就得啦，就連普通遊客攞番份簡介出嚟都噏得出，納稅人又使乜用公帑資助議員考察？

更抵死嘅係，議員排排企向記者總結行程，立法會主席講嘢時，企喺旁邊嘅劉秀成仲揸住相機猛咁影相，白鴿黨「肥仔明」李華明仲大模廝樣當眾整理自己嘅衣領，相當搶眼，而後面嘅醫護界李國麟就發揮醫護人員嘅助人精神，諗住幫肥仔明一把，兩個人大庭廣眾扯嚟扯去，唔知佢哋知唔知當時電視台現場直播緊嘅呢？

跟住大夥兒仲大談人家嘅展館幾咁環保，立法會主席講完，跟住內會主席劉健儀又講，就連經濟動力嘅梁劉柔芬都搶住嚟話要講幾句，之後仲好似分餅仔咁，人人有份講。

立法會世博團係畀議員考察高鐵運作同了解上海最新發展，議員睇完清明上河圖、感受過立體影片，同埋遊完「探索之旅」後，收穫只係可講到高鐵座位間隔太窄，同埋香港館內容太單薄呢啲浮面說話，收穫實在太單薄嘞。

如果從納稅人嘅角度睇，今次世博團嘅最大收穫相信係班議員喺展館區內大灑金錢嘅「戰利品」，同埋幾位冇回鄉證嘅白鴿黨議員，聽講整個行程玩得最開心嘅係佢哋。