小白觀點：煲呔曾夫婦好登對

有個助理文書主任居然可以喺同一崗位做超過七年都未調職，真係把炮！唔好睇佢官職鼻屎咁細，不過講到後台咯喎，就唔講得笑咯，道聽途說係當今特區第一夫人！煲呔曾份人最愛益親家係人都知，原來佢老婆一樣係親疏有別，夠晒登對。

有人話特首夫人身份敏感，應該避免瓜田李下。不過，小白老弟覺得即使有人使橫手留人，亦都無可厚非，你知啦，堂堂一個外戚，竟然連一個近身小宦官都保唔住，未免有悖我國宮闈傳統！講開歷史，近排日日有人上街抗議，「民變迭起」簡直歷歷在目；周不時枯樹壓親人，成棟樓都冧得落嚟，「天災頻仍」更加唔使講啦；依家再多一個「戚宦亂政」添，有讀過歷史嘅朋友都知道，中國歷代衰亡嘅原因來來去去都係呢幾味，家陣幾乎執齊晒，煲呔曾去宋王臺練定笨豬跳都得！

e-mail：sunsiupak@gmail.com

Blog：http://sunsiupak.blogspot.com

阿豪觀點：寵臣轉做副局一了百了

煲呔曾用人唯親就係人都知，有傳佢夫人寵愛一名禮賓府助理文書主任，任期超過六年唔調職，預料做到保呔曾任滿至走人。

政府嘅解釋真係愈描愈黑，一方面又承認有個喺特首辦做嘢嘅助理文書主任，過咗六年時限期都未走頭，另一方面，又話各局或部門可以分階段喺○九年至一三年期間安排內部職位調派，咁呢六年時限到底設嚟做乜先？

唉，其實呢個問題好易拆啫，只要煲呔曾乾脆將呢個職位轉為問責官員，好似副局政助咁政治委任咪得囉！

咁樣做嘅好處就多囉，最重要係煲呔曾鍾意請邊個就請邊個，佢老哥鍾意嘅話，肯定可以留人留到佢落台為止，二來請呢個人返嚟，根本唔使「做好呢份工」。

大家不妨諗吓，依家呢批副局政助裏面，大家講得出邊個打邊個嘅又有幾多呢？

e-mail：lukchiho75@hotmail.com

Blog：http://lukchiho.blogspot.com

網友觀點……

工廠主任：助理文書主任一定係超級筍工，好嘢點會益外人吖？

茅山弟子：捉完家鬼，依家係時候捉埋隻賴死鬼喇！

周　　仔：禮賓府內閉門一家親，有回家真好嘅感覺。

羊咩蘇：做咗六年都冇職升，愛佢簡直變成害佢！

有料爆

唔知電腦防火牆，可唔可以隔埋冒牌大肚婆？

SMS傾埋一份：6016 2496