衞生署話喎，嘉琳製藥生產嘅藥物多次未能通過藥物分解測試，有啲藥物嘅抗生素同維他命成分低過註冊分量，到目前為止已有十幾款藥物被驗出有問題，顯示藥廠喺生產過程中出錯，所以該廠生產嘅四百幾款藥物統統要回收。

一次過回收四百幾款藥，簡直係聞所未聞，見所未見，呢啲藥包羅萬有，包括抗血小板藥、哮喘藥同降膽固醇藥，可大可小o架。醫藥界人士要求衞生署優先化驗呢幾種藥，如果發現有問題，必須立即通知病人換藥，否則隨時搞出人命。

其實，早喺上個月中，澳門當局已驗出嘉琳製藥嘅藥物有問題，香港衞生署先至如夢初醒，展開大規模化驗行動，點知足足等咗半個月至宣布回收。但點樣回收，衞生署同廠家仲未公布具體安排，咁搞法，直情係靠害市民！

話時話，如果唔係澳門當局先發現問題，香港衞生署可能依家仲係矇查查。不過，咁嘅事一啲都唔奇，事關衞生署不嬲後知後覺，就連本港百年老字號保濟丸含有禁藥成分，都係新加坡衞生部門首先發現，港府至跟進。香港藥廠生產嘅藥物出問題，次次都係外地政府先發現，衞生署麻木遲鈍，簡直匪夷所思。

嘉琳製藥一早就取得所謂「良好藥品生產規範」嘅GMP牌照，點解會有咁多款藥出事o架？唉，提起GMP就笑甩人哋棚牙，近年有好多間藥廠出事，發霉藥、無牌藥、過期藥，無奇不有，呢啲廠邊間冇GMP牌照呀？

正如業界人士話齋，嘉琳製藥連一啲簡單嘅步驟都冇做好，根本唔符合GMP要求。叮，所謂GMP究竟係乜嘢一回事，大家心照喇！

衞生署唔監唔管，唔出事至奇。舊年歐化藥廠被踢爆生產發霉藥，輿論狂炳衞生署失職，當局係威係勢成立咗一個藥物監管制度檢討委員會，經過一輪所謂嘅研究，提出七十五項改善建議。但係話口未完，問題藥物又陸續有嚟，可見呢七十五項建議根本冇落實，衞生署由頭到尾都係做騷。

叮佢個鎯鎯，藥物品質關乎市民嘅生命安全，點可以咁兒戲㗎。請問衞生署署長林秉恩，唔通真係要爆鑊杰撻撻嘅，你哋先至肯正視，肯做嘢！