本文重點
好多仔女今日都會趁母親節表心意，菁英會主席施榮忻（Jamie）就透露，佢哋尋晚已經同阿媽先行食飯慶祝，施家幾兄弟好尊重阿媽，大哥施榮怡話，媽媽喺屋企嘅地位係最尊貴嘅，媽媽當年湊大佢哋幾個反斗星一啲都唔易，佢憶述話：「當年媽媽要拖一個、孭一個、抱一個咁去買餸煮飯，仲要煮埋大鑊飯畀工廠班工人食，都咪話唔辛苦！」
儼如屋企嘅總書記
施榮怡話，媽媽好似屋企嘅總書記咁，爸爸就只係副主席。身為廠商會副會長嘅二哥施榮懷就大嘆佢係幾兄弟之中最好彩嗰個，因為佢係唯一一個有幸食母乳大嘅，佢回憶話：「大佬本身都係食奶粉，但我出世時家境唔係咁好，所以要轉食母乳，每次諗起都覺得媽媽好偉大！」
Jamie最難忘嘅，卻係媽媽對佢嘅教導，仲大爆佢媽媽出嫁前，原來係一名水都唔識煲嘅千金小姐，所以佢咁多年嚟一手一腳將頭家打理得頭頭是道，一啲都唔易。施家揀咗尋日慶祝母親節，咁啱大哥榮怡名下愛駒「愛拚者勝」尋日亦喺第五場跑出，帶嚟逾三十五萬元獎金，一家人開開心心拉頭馬，真係錦上添花！