社民連「長毛」梁國雄近排惡搞自訂車牌計劃，不惜工本先後用英文詞彙自訂咗幾個車牌，諷刺行政會議召集人梁振英（CY）同煲呔曾，其中疑似諷刺CY嘅「CYUSH0」車牌三月已拍賣，但長毛遲到錯過咗；疑似詛咒洋名Donald嘅煲呔曾「D0NALD PK」車牌則不獲批，長毛後來改為「D0NALDPK」，先獲准尋日朝拍賣。
呢個拍賣每口價一千蚊，長毛一心諗住以底價五千蚊就可以捧走個車牌，可惜事與願違，最後嗌到萬七蚊先得。佢大呻買貴牌，仲自爆叫到一萬七千蚊價位時已開始縮縮哋，如果再叫高啲就放棄喎。
同長毛爭奪車牌嘅原來係優質幸運車牌中心負責人顏文翰，佢開門見山咁話長毛玩人就要付出代價，佢唔應該破壞香港繁榮穩定，搞咁多鬧人嘅車牌，只顯得佢心胸狹窄。被問到競投背後係咪有人撐腰，顏文翰就話：「如果我有人撐，叫價叫到十幾萬都同佢（長毛）爭啦！」
長毛參加咗新界東補選，唔知係咪氣氛冷清，連拍賣場曝光嘅機會都唔放過，佢喺新界東嘅對手周澄、陳國強同胡世全要靈活出擊至得喇。