退出官場後，中策集團主席馬時亨活躍於學界，經常出席大大小小嘅演講，尋日佢應城大邀請出席個活動時，大講當年喺美國捱世界嘅經歷，呼籲青年人要吃得苦中苦，仲要努力先能夠改變逆境。
肥亨憶述七三年喺港大畢業後，入咗美資大通銀行做見習生，三年後獲上司推薦去紐約總行做嘢，初時感覺飄飄然，點知去到美國就日日畀上司鬧，自信盡失，加上佢對美國地方又唔熟悉，有次客人講起美國嘅牧場Sterling，佢仲以為人哋講緊英國嘅同名城市添，認真瘀皮。不過，肥亨唔服輸，逢禮拜六、日嘅休息時間，都例牌拎罐可樂返公司睇文件同美國地圖，佢好幽默咁話：「都唔知呢個係咪就係我嘅致肥原因！」年半後，佢獲上司肯定並升埋職添。
不過，肥亨尋日出席講座都有段小插曲，事緣活動嘅司儀介紹佢時，竟然稱呼佢為「前財政司司長」，肥亨即時耍手擰頭話唔係，司儀打圓場咁死撐：「雖然個銜頭可能係加上去，但佢做嘅嘢都相當於司長o架喇……」咁樣執生都得？