本港名人二代近年努力喺政商界經營，又組成本地青年組織投身社會工作。青年圈中近排有件大事，因為全國青聯今年七月換屆，根據傳統，全國青聯領導層中，香港青聯都有代表做副主席，現任副主席係前人大常委曾憲梓二仔曾智雄（William）同「新金王」、全國政協委員黃英豪，佢哋兩人即將卸任，到底邊個會做新血呢？
圈中有傳，今屆香港青聯嘅主席陳仲尼（Rock）可望順理成章更上一層樓，接棒做全國青聯副主席。William早前出席《香港五四青年節2010》活動時，都撞到阿Rock，問William點睇，佢話邊個接棒未到揭盅嗰一刻都唔知結果，但香港青聯一定會力撐阿Rock做全國青聯副主席。
William今年都有喜事，七月會做爸爸，佢已經搵咗香港青聯常務副主席葉振都個婦產科太太幫手接生，有熟人睇住，佢話會放心啲，等太太坐完月，諗住九月齊齊去上海睇世博，玩幾日兼慰勞太太。