懷舊風近年大行其道，屹立沙田三十幾年嘅萃華酒家（前稱「瑞華酒家」），曾同隔鄰嘅楓林小館並封為「沙田雙寶」多年，沙田區議會主席韋國洪好鍾意去嗰度醫肚。
身為沙田原居民嘅韋國洪憶述，當年萃華同楓林、小欖公齊名，喺沙田舊墟開業（現沙田廣場一帶），七九年萃華跟隨楓林搬到大圍現址開業，屹立至今，政商界名人食客依然不絕，好似教育統籌委員會主席鄭慕智、冠軍練馬師「食力簡」簡炳墀、立法會議員葉劉淑儀、前立法會主席黃宏發、歌神許冠傑等。
萃華嘅懷舊招牌菜有紅燒乳鴿、椒鹽吊片、炸釀豆腐等，甜品就有山水豆腐花，並配備傳統黃糖。韋主席最鍾意係紅燒乳鴿同椒鹽吊片，大讚乳鴿皮脆肉嫩，肉汁豐富，十分香口，最難得係隨鴿附上炸鴿心同炸鴿膶，而椒鹽吊片就好夠鮮味，炸得香脆又唔會太乾。