本港雖然只得八間大學，但彼此間競爭好大，近年更因為不時有新嘅國際排名而愈演愈烈。城市大學尋日舉辦咗個研討會，由知名人士向百多個精英中學生講解成功之道。城大校長郭位借呢個場合講解揀大學之道，佢話揀大學唔應該重名氣，而應該睇自己合適嘅科目同師資。郭位暗示乜嘢？啲學生明嘅。
郭位尋日借豐田汽車嘅例子嚟講解名氣，佢話豐田汽車最初打入美國市場時，曾經被好多人睇死，但佢哋接受咗市場嘅考驗，好快成為美國車市嘅中堅分子。可惜，近排豐田汽車出咗唔少問題，管理層又拒絕及時回應各種傳聞同事故，結果喺美國車市升得快、亦跌得快，可見名氣嘅作用唔太大。
佢跟住話呢個世界有兩種人，一類人係睇大學嘅名氣，希望讀一間有名氣嘅大學嚟提升個人地位；另一種人則係透過自己嘅努力，去提升嗰所大學嘅名氣。佢仲話，以前俄亥俄州立大學喺美國好出名，但加州大學追得好快，可見大學嘅名氣、排名可以變化好大嘅。