香港去上海，本來只係三、四粒鐘嘅事，但議員要試搭高鐵，兼了解將來香港興建嘅高鐵點樣同內地呢條鐵路接軌，所以秘書處安排咗議員海陸空之旅，朝早七點出發，經過十三粒鐘舟車勞頓至去到上海，搭車、搭船兼搭飛機，想唔腰骨梗都難。

秘書處今次安排議員坐高鐵二等艙，唔少議員都覺得座位之間嘅距離太窄，全程都伸唔直隻腳。佢哋上車後，先行一圈參觀，仲有得入埋駕駛艙影相添！首次搭高鐵嘅工聯會黃國健（KK）話，高鐵真係好快好定，比起歐洲之星同日本新幹線仲要好，唯一美中不足係座位太窄，加上行車時有唔少噪音，影響舒適度。

促加強沿線電話訊號

資訊科技界代表「IT豪」譚偉豪亦係高鐵初哥，佢認為座位窄係個大問題，幸好速度可以彌補呢方面嘅缺陷。本身係IT專家嘅IT豪仲發現，高鐵沿線嘅電話訊號收得好差，呼籲當局快啲改善，否則可能影響返大陸公幹嘅專業人士乘客。

議員一路風塵僕僕，坐高鐵嘅四粒鐘先可以稍為歇息，可以試吓高鐵嘅飯盒、零食等，有啲留意高鐵嘅噪音，有啲就留意車速到底有幾快，白鴿黨幾名議員各有各關注，涂謹申就關心香港高鐵起好咗之後，有冇可能好似佢哋坐嗰架咁快，亦有議員關心將來香港高鐵嘅車廂設計會唔會有唔同。

不過，大半日頻撲真係唔易捱，好多議員喺專家介紹時都攰到瞓着咗。嚟緊兩日，佢哋都係行程超緊密，世博團真係太搏喇！