小白觀點：球員懶懶閒難分真假
近排又爆打假波風暴，成為網上熱話，不過小白老弟希望大家唔好立亂用「打假波」呢三個字。
先從語理分析一下，「打假波」係好含混兼有歧義嘅字眼。首先，我見本地嗰啲球員成日踢出界嘅球類物體，冇三尖八角，明明係圓形，睇個樣唔似做過手術植入矽袋，亦冇任何浸過木瓜奶嘅漬，咁何來有假呢？
再講吖，本地球星作賽，極少出現追波踢又或者凌空抽射、爭頂頭槌等鏡頭，一般坐喺看台瞌眼瞓嘅觀眾，實在好難分得出個波係咪有硬化或高速下墜之類嘅任何不尋常反應，所以到底係真波定假球，好難落一個結論。
而且，佢哋落到場，嚴格嚟講唔可以叫「打波」，因為十一個有十個都係行行企企睇波多，所以呢，就算有任何不正當行徑，頂多只可以稱之為「睇假波」，大家明解未？
e-mail：sunsiupak@gmail.com
Blog：http://sunsiupak.blogspot.com
阿豪觀點：蚊型本地波唔值冒險
本地足球假波風暴愈演愈烈，再有多名球員牽涉在內。豪伯作為一個賭博嘅門外漢，有一樣嘢諗極都唔明，要造假，唔係要個pool夠大、有肉食至維到皮嘅咩？本地足球賽事有幾多人睇，大家心裏有數啦，都係得百零丁友咋喎，點解要大費周章，冒咁大風險呢可？要賭，大家不如賭吓牙骹、打吓手板仔咪算數囉！
撇開呢單嘢唔講，打假波呢個風氣真係不可一、不可再呀，因為咁樣對啲弱隊真係好唔公道o架！大家諗吓嘞，如果有日國足咁好彩贏到巴西隊，試問到時大家會唔會認為對手收咗錢所以故意放水呢？
不過話時話，其實好多運動員都有好豐富嘅演藝細胞。唔係咩？次次東窗事發，都係唔知喺邊度收到風，而幾乎從來冇人因為場上表現失常而斷正，佢哋唔加入演藝圈，無疑係觀眾嘅損失！
e-mail：lukchiho75@hotmail.com
Blog：http://lukchiho.blogspot.com
網友觀點……
A 高：呢度啲球員人工咁奀，要抗拒利誘真係唔易o架。
朗拿度：請咁多國援，打假波只係遲早嘅問題。
波 仔：本地足球已一潭死水，仲整埋假波真係搵鬼睇！
Tony Ja：內地乜都假，傳咗啲打假波嚟香港，有乜出奇啫。
有料爆：
港鐵咁多色魔，學吓外國整女性專列至得。
SMS傾埋一份：6016 2496