就以「穩定樓市」這場波來說吧，但見高官們個個施展絕技，精彩表演扣人心弦。先是鄭汝樺巡查示範單位開出短波，復見林鄭月娥矢言彈性賣地的假腳插花，財爺曾俊華這頭才說「向炒樓者徵利得稅」，稅務局局長朱鑫源即開出「徵稅黑名單」，一個撞牆，將個波交番小曾腳下，再來個「九招十二式」的大腳傳中，冷不防，市建局又來個「八大辣招」，施盡渾身解數，左翼直闖敵陣。

眼見足球盤入對方禁區，史上最弱勢的政府竟敢對全球最強勢的地產商動出真格，七百萬人目瞪口呆。突然，場邊響起如雷吶喊，一邊大叫復建居屋，一邊期期以為不可，爭持之下，曾蔭權靈機一觸，忽在答問大會轉身一腳，將個波傳給市民，曰：「畀五個月你哋諮詢，睇吓點樣資助基層置業，睇吓先啦，呵呵……」

市民接過波，張口得個窿──將個波交畀觀眾，真乃聞所未聞見所未見。無他矣，事關咱政府任期只剩兩年，老子已經天天想着退休，多一事不如少一事，一於諮詢復諮詢，拉布等夠鐘矣。

如此無心戀戰一隊波，指望他們復興港足，怎可能不撞柱彈出？