其實唔單止睇醫生要等，喺公立醫院藥房攞藥亦隨時要苦苦地等，咁先至令人眼界大開。本報近日巡查十間公立醫院，發現各間藥房輪候時間差天共地，例如大埔那打素醫院咁，病人取藥竟要等足九十分鐘，問你服未。

那打素醫院藥房話就話有四個派藥櫃枱，但經常只開一個，原來最少有兩個配藥員因「病」休假，半年都冇返工，院方又唔補足人手，加上藥房職員做嘢滋油淡定，一定要配好十個病人嘅藥先一齊叫號，搞到病人一窩蜂排隊取藥，七國咁亂。

正如有區議員話齋，公立醫院派藥程序僵化，明知藥房藥單多都唔將藥物分流，又唔增聘人手，加開派藥櫃枱，令病人捱病苦等，極不人道。

叮，就算冇病嘅人等個幾鐘都隨時等出病啦，何況病人係咁苦等，病情唔加重至奇。

最搞笑嘅係，院方係威係勢咁推出新措施，話容許病人喺四個工作日內攞藥喎。有鬼用咩！嚟多一次，咪等多一次，仲嘥埋車錢添。仲有呀，睇完醫生梗係快快趣趣攞藥食啦，所謂四日內攞藥，簡直係混吉！

大家咪以為那打素醫院攞藥要等九十分鐘係全港最高紀錄，黃大仙聖母醫院仲犀利，上周有批病人等足一百二十七分鐘先至攞到藥，原來係藥房職員食飯要緊，話之你等啦。其實，好多公立醫院都係咁，病人攞藥閒閒地等成粒鐘，見怪不怪咯。

業界人士踢爆，醫管局從來都冇為醫院藥房設立服務承諾，藥房變咗無王管，你急佢唔急，藥房職員咪慢慢派藥囉。

慢慢派藥都唔緊要，最驚係成日派錯藥，例如瑪麗醫院平均每月發生二十幾單配錯藥或派錯藥事故，直情係搵病人條命嚟較飛。

可能畀人炳得多啩，醫管局聲稱會喺公立醫院引入快速配藥系統，個別醫院仲會增加配藥櫃枱。叮佢個鎯鎯，呢啲都係舉手之勞，一早就應該做啦，醫管局每年幾百億元經費，連派藥都派到七國咁亂，對唔對得住納稅人呀！