小白觀點:詭辯思維無人能及
牛津大學新任校長讚香港學生醒目,入牛津有好大嘅競爭力喎……唔係啩?點解成日有人話依家香港學生水準唔係每況愈下嘅?班小朋友向來有聖賢書唔好好讀,「兩耳不聞窗外事,一心索K性濫交」,如果咁都有競爭力,唔通英國學生個個都係番薯?
計我話,香港學生真係一啲都唔弱㗎,佢哋平日喺香港耳濡目染,好嘅唔學,衰嘢就學到足,比起世界任何一個地方嘅同齡小朋友叻得多。唔使講乜吖,佢哋聽得多特區高官嘅廢話,詭辯思維簡直係無人能及,即使蘇格拉底翻生都會拗輸,唔使飲毒藥,監生激死都得呀!
仲有喎,香港學生何止去學嘢,以佢哋嘅識見,直情可以做埋教授,主講最深奧嘅《時間簡史:從民怨大爆炸到政府大花筒黑洞》,我估連霍金大師都要喺劍橋大學轉會去牛津呀!
Email:sunsiupak@gmail.com
Blog:http://sunsiupak.blogspot.com
阿豪觀點:校長賣口乖吸貴客
牛津大學新任校長Hamilton表示,本港學生如果喺中學文憑試考獲5級或5*級成績,喺報考牛津大學時會有好大競爭力。
嘩!連牛津大學校長都讚香港學生醒,睇嚟特區政府真係要借機大事宣傳一番喎!
不過唔好咁開心住,聽真啲,原來Hamilton校長都講得好白,佢話喎,受金融海嘯影響,英國政府將大幅削減對大學嘅撥款,淨係講牛津,校方就需要籌募逾十億英鎊捐款。唔怪得之咁好口啦,梗係要對你哋呢班潛在顧客賣吓口乖嘛!
不過話時話,Hamilton今次真係冇去錯地方。英國私校協會最新數字顯示,今個學年新入讀當地私立學校嘅香港學生人數超過一千八百五十人,比上學年大幅增加一成三。即係話,其實唔使多作推銷,班港生自然會仆倒咁嚟。如果牛津開埋「先修班」嚟擴大「客源」,相信都一樣爭崩頭呀!
Email:lukchiho75@hotmail.com
Blog:http://lukchiho.blogspot.com
網友觀點……
校工:聽咗校長呢番話,想逃亡嘅學生會回心轉意考文憑試嗎?
甘仔:佢咁讚法無非想港生放膽嚟報考,達到開源嘅目的!
學童:校長係咪禮貌上去邊度訪問都係咁講咋?
小賓:劍橋校長幾時嚟埋齊齊唱好新學制?
奶哥:牛頭角津貼中學咁講又唔同。