母親節又到，好多仔女都會趁聽日向阿媽表心意，食飯、飲茶、送禮物幾乎係指定動作，不過，政商界忙人禮拜日未必得閒，結果各有各辦法。本港第一個恒生銀行女大班梁高美懿係大忙人，母親節未必有時間陪媽咪一日，上個禮拜三，佢就趁夜晚有時間，同媽咪十指緊扣咁入沙田馬場食飯預先慶祝，高媽媽完全明瞭愛女嘅心意，甜絲絲咁望住叱咤銀行界嘅女兒話︰「個女好孝順我！」
另一個孝順仔、醫管局主席胡定旭亦冇辦法喺正日同阿媽慶祝，事關佢尋日上咗四川做災後重建工作，禮拜一至返嚟，但隨即又要忙住開醫管局一年一度嘅東南亞交流會，所以佢好頭痛，家吓都未搵到時間同阿媽慶祝，佢話一定會搵時間補祝。
今日就跟立法會世博團去上海嘅立法會議員林健鋒同黃容根，聽日亦唔喺香港，但佢哋話去上海一定買禮物返嚟氹阿媽補數。呢班孝順仔女咁有心，喺唔喺正日慶祝又有乜關係呢？