二○一二年兩個選舉產生辦法嘅各方爭拗多多，經濟動力「4L」牽頭搞嘅工商專業政改動力，尋日第二次舉辦政改論壇，請咗普選聯同特區政府官員嚟唇槍舌劍一番，現場仲有成二百幾人添，場面相當墟冚。不過，早前曾傳出同4L有摩擦嘅專業會議，竟然一個都冇露面，唔通佢哋又鬧翻？
尋日工商專業政改動力個騷邀請到好多嘉賓，連少有踏足親中團體活動嘅一班民主派人士，好似白鴿黨主席何俊仁、教協主席馮偉華等都有出席，並且做埋講者，令論壇出現唔少火花，相對一啲聲音一面倒嘅論壇似乎更有睇頭！
不過，喺二百幾名嘉賓當中，並冇早前加入工商專業政改動力嘅專業會議，佢哋四個人不約而同唔出席，自然引起好多聯想，譬如早前林健鋒選立法會政改小組會副主席時，專業會議嘅何鍾泰同劉秀成，被懷疑聯同葉劉淑儀一齊「倒戈」，投咗票畀白鴿黨劉慧卿。經過連番事件，睇嚟傳出專業會議醞釀退出政改動力嘅傳聞未必無因。