希臘財困引發嘅歐洲金融風暴一觸即發，美國股市尋日凌晨經歷恐怖嘅十分鐘，道瓊斯指數一度暴跌近千點，搞到第日開市嘅港股都風雨飄搖，唔少股民都擔心香港出現類似美國嘅疑似錯盤交易。市場立立亂下，卻只見港交所主席夏佳理朝早出嚟澄清本港系統與美國唔同，政府財金官員就全日唔見影，咁大件事都冇人出嚟安定人心，政圈中人都話奇怪。追查原因先知道，尋日財政司司長鬍鬚曾同財經事務及庫務局局長陳家強一個放假、一個公幹，個龍門咪變咗空門囉！
尋日雖然唔係黑色星期五，但環球金融市場都人心動盪，多個國家嘅財長更急急開會應付危機，呢個危險時刻，本港兩大財金官員去咗邊呢？政府憲報透露，鬍鬚曾一早攞咗假，五號、七號同八號都放假，但就冇講佢去邊。至於傻強就因為公務離開咗香港，尋日下晝至返嚟，財政司司長嘅工作就暫時交由商務及經濟發展局局長劉吳惠蘭署理。兩大財金官員出缺，撞啱股市天翻地覆，政府惟有扮冇嘢。
翻查政府公告，鬍鬚曾似乎一早攞咗假，但五號到八號嘅假期中間，禮拜四（六號）佢又專登返工，呢一日係孖曾兄弟煲呔曾兩度改期、落立法會舉行答問大會嘅日子，或者係咁，鬍鬚曾取消中間一日假期嚟撐場，翌日先放番假，點知又撞正環球股市大件事！