本港球壇再次爆出打假波醜聞，令熱愛足球運動嘅球迷好失望。曾經擔任愉園班主、現任沙田足球隊班主嘅立法會議員林大輝，將矛頭直指香港足球總會嘅連串糊塗帳，炮轟足總管理不善，冇盡力預防打假波醜聞發生，呼籲政府撥款前必須先整頓足總，否則本地球壇遲早玩完。不過，足總揸Fit人梁孔德尋日就話：「林大輝最鍾意講嘢，但佢都唔知我哋（足總）做咗啲乜嘢。」又話近期嘅事件同管理無關。
對本地足球心有戚戚焉嘅大輝話，足球壇貪污醜聞已令香港足球事業衰足二、三十年，好似舊年三月地區球隊屯門普高涉嫌打假波，足總不但冇向外界交代事件，又冇訂立有效機制防範，一年後嘅今日再次爆出打假波醜聞，完全反映足總嘅財政、管理及專業水準極差。大輝仲借政府公布嘅足球顧問報告建議，指政府往後撥款畀足總前必須三思，最好係整頓足總後至批出撥款。
梁孔德對於上述指摘不以為然：「上次（屯門普高涉嫌打假波）已經同廉署定咗啲指引，亦都派咗畀球會啦！」梁又強調，打假波係球隊問題，並非足總嘅問題，仲話：「上次意大利打假波，都係罰球會啫，唔係罰意大利足總吖。」但佢都承認近兩年足總收入少、開支大，確係財政緊絀，但管理並冇問題。