立法會近排傳出主席辭職後嘅安排，中總代表「IQ博士」黃宜弘好大機會成為立法會主席嘅接棒人，仲話佢會唔理任何包袱，一邊做主席、一邊投票。建仔主席譚耀宗、白鴿黨主席何俊仁同會計界陳茂波都唔肯評論，只有表明下屆想卸任嘅進出口界代表「象哥」黃定光，肯明明白白咁撐IQ博士做主席。
象哥話，今次只係以事論事，雖然佢撐IQ博士，但佢始終覺得立法會主席唔一定會辭職，而且每個議員都有資格選立法會主席，IQ博士當然亦係可以考慮嘅人選。
講到IQ博士曾經引發「中指風波」，象哥即刻擰晒頭，話呢個更加唔係問題：「當時佢係被人挑釁先至發生啫，而且比起依家好多人喺議事廳講『不該』差得遠啦！」