粵劇成為世界非物質文化遺產後，特區政府同立法會議員都對支持粵劇落多咗心機。尋日立法會民政事務委員會五個議員去油麻地戲院地盤、紅磚屋同高山劇場參觀，為下個禮拜小組討論喺高山劇場起附屬大樓同向粵劇發展基金注資等問題做準備，偏偏事前天降豪雨，現場一片泥濘，難為成員之一霍震霆着住名牌Prada褲直踩地盤，搞到褲腳沾上泥水。
除咗霍公子外，仲有林大輝、王國興、劉秀成同葉國謙一齊湊熱鬧，佢哋落到現場周圍睇，霍公子喺工地左捐右捐，一下唔覺意，褲腳近鞋踭位置沾上一撻撻泥濘，佢條褲係Prada出品，着住幾千蚊嘅靚褲落地盤，會唔會肉赤呀？佢一啲都唔介意，仲笑騎騎咁話：「呢啲係普通嘢啫。」
重遊油麻地戲院，霍公子勾起唔少兒時回憶。佢自爆細個時成日陪嫲嫲睇粵劇，可惜佢對大戲興趣麻麻，大老倌梁醒波喺台上演出，佢就喺台下睇錶，希望時間快啲過。不過，院外有一樣好吸引佢嘅嘢，就係小販擺檔賣嘅鮑魚等美食嘞，一啖一隻，回味無窮。唔係嘛，當年小販興賣鮑魚？