泛民喺飯盒會交流咗幾項議題，講到逼政府攞錢出嚟，佢哋可能最有共識。有議員話，鬍鬚曾出任財政司司長以嚟，年年都大玩一邊估少收入、一邊估大開支嘅遊戲，搞到香港人先食驚風散，然後又忽然富貴，勒緊褲頭帶到年尾，先發現庫房有大筆盈餘，結果筆錢平平安安入咗庫房，小市民又被人呃咗一年。

講講吓，佢哋認為應該傾個機制出嚟，嚴格監管政府估錯數，即係話，即使政府計錯數、多咗錢，啲公帑都唔會直接存入庫房，而係必須用之於民。佢哋嘅構思包括短期同中長期方案，短期係首先考慮有乜嘢加碼紓困措施，盡快利用多出嚟嘅額外稅收扶助基層。

設基金帳戶儲意外之財

中長期方面，佢哋就希望成立一個還款於民嘅機制，譬如喺政府儲備之外設立一個基金帳戶，每年政府預算之外嘅收入就歸入呢個帳戶，政府動用呢個基金嘅錢要有清楚規定，總之一定要用番喺市民身上。鬍鬚曾早前出席立法會辯論預算案時，死都唔肯承諾加碼推紓困措施，只係話公帑要用得其所，如果泛民呢個機制可以落實，第日點樣用呢筆錢，同係咪用呢筆錢，就再唔係鬍鬚曾同政府啲孤寒高官話晒事嘞。

今年呢筆意外之財高達二百幾億元，唔係細數目，不過，泛民議員想爆政府個脹卜卜嘅夾萬都唔係易事，因為涉及財政司司長權力同更改儲備支取嘅模式，即使喺議會，都要其他建制派議員同意至得，所以泛民呢個建議睇嚟有排拗。