大家千祈唔好信以為真，事關警方嘅保密工作也也烏，三頭兩日就爆發洩密事件。嗱，話口未完又出事嘞。投訴警察課一個警長晚間去尖沙咀蒲，到半夜三點先至搭的士返屋企，唔知係咪飲大咗，居然將三份機密檔案留喺架車度。

呢啲都係市民投訴警員嘅資料，勁敏感。警方高層嚇到一額汗，即時聯絡多家的士公司同Call台，搵咗六十粒鐘先至搵番啲檔案。

話時話，因乜事大懵警長會帶埋機密資料去蒲嘅？不過，如果你知道警隊內部管理有幾亂，就唔覺得奇怪嘞。警方高層話就話有內部指引，規定休班警員唔可以隨便將文件帶出辦公室，但係好多警員貪方便帶住啲文件四圍去，警方高層就隻眼開隻眼閉，咁有乜法子唔洩密呀。講真，警方直情係靠害，如果啲資料落到不法分子手上，投訴人咪有排煩？

其實，今次出事都唔奇嘅，警方不嬲好似冇掩雞籠，洩密等同食生菜。莫講話市民投訴嘅資料啦，就連派遣臥底嘅核心機密，都可以傳通街。呢，前年五月，有網民用Foxy軟件下載音樂，就無意中發現六份警務處檔案。其中一份犀利咯，詳細記錄打入犯罪集團探員嘅資料，包括佢本人同埋被調查人士嘅身份證號碼、手提電話、地址等等。嘩，如果畀犯罪集團攞到手，個臥底仲有命嘅！

係人都知，臥底係高危工作，身份暴露就分分鐘冇命，但係警方居然玩玩吓咁，叮！

不妨講多個畸士，近排校園吸毒猖獗，警方派警員扮學生偵查毒品源頭。有間中學校長一心搞好警民合作，畀一名警花扮中三學生，本來將疑犯繩之於法嘞，點知警方有人叻唔切，將校名爆出嚟，令人哋以為學校係吸毒竇，激到校長紮紮跳。

警方根本冇將市民私隱當一回事，難為私隱專員吳斌仲猛讚警方對私隱問題十分重視。佢仲話，有咁多洩密個案，係因為警隊人多，需要時間培養私隱文化喎。

叮佢個鎯鎯，慢慢培養得嚟，蛇都死啦。請問警方高層，唔通真係要死幾個臥底，你哋先至會關注洩密問題咩？叮！