本文重點
首屆地方行政高峰會喺○八年五月十日舉行，咁今年五月係咪再搞？有知情人士透露，有「騰雞美華」之稱嘅民政事務總署署長陳甘美華，早喺今年三月已向十八區區議會主席提及續辦高峰會一事，但冇觸及具體安排，原來政府早已變陣，秘密將高峰會押後到七月二十一日喺灣仔會展舉行。
高峰會延後兩個月舉行不難理解，事關若如期喺五月舉行，太接近立法會補選投票，高峰會勢必畀泛民主派騎劫，成為催谷投票嘅最佳平台，當局為免幫泛民造勢，都係押後為上策。但避得過補選，又要面對立法會喺七月中旬表決政改方案噃！
唔想煲呔曾丟架
為咗通過政改方案，煲呔曾不惜以取消區議會委任制做籌碼，企圖換取泛民支持，隨即畀委任制下嘅區議會主席鬧爆。橫掂好多委任議員任期將近屆滿，到時大可冇顧慮喺高峰會上鬧個夠本，為免煲呔曾到時丟架，民政事務局局長曾德成同騰雞美華惟有變招。
除咗延期之外，連開會形式都改埋，事關首屆高峰會分組討論安排惹嚟好多議員批評，話未能夠暢所欲言喎，所以今年六月開始先分五大區做諮詢會，分別就小型工程、保育、文娛活動等範疇討論，仲由相關政策局官員回應，先紓解地區人士嘅不滿，為高峰會卸咁啲力，當係德成局長同騰雞美華提前「拆彈」，亦都係補鑊之作。