喺深水埗、美孚呢啲舊區住咗好多長者，一班老友記有時唔識搭車，入到港鐵站都唔知乜線打乜線。港鐵公司事務總經理梁陳智明本身係美孚舊街坊，佢特別搞咗個「社區老友大使」計劃，搵咗四個「年輕」長者喺車站做其他長者乘客嘅盲公竹，指導佢哋買飛同搭車。
梁陳智明住喺美孚好多年，十幾年前搬咗去中區，但仍然心繫「祖居」，佢媽咪同家姐都仲住喺美孚，所以佢一個星期都會返去行一次。佢話人口老化係必然現象，美孚又係老區，長者係比較多啲，所以好希望「社區老友大使」真係幫到班老友記搭車。
四個大使之前已經去過深水埗當值，九成六曾經接受佢哋幫手嘅乘客都話好歡迎呢個計劃。其實「關懷長者」變成好多政客拉票嘅口號，但真正嘅關懷唔係得把口，係要落手落腳做嘅。