05/05/2010

播放本新聞相關短片

政情:阿魚復出升呢教浸大

社會福利署前署長「阿魚」余志穩離開官場已差唔多九個月,但佢嘅退休生活一啲都唔「他條」,尋日佢幫私隱專員吳斌出席保障私隱嘅宣傳活動,向長者呼籲小心保護個人資料,仲透露雖然已退下火線,但佢退而不休。

阿魚退休後不時做義工,依家幫緊浸大同理大做客席講師,每季客串一、兩堂,講吓社會貧窮同市區重建嘅問題,下個星期仲會去浸大同學生討論社會企業課題。佢透露自己一直都好想執教鞭,如果有機會都唔介意做吓兼職講師,仲希望講番自己「老本行」,同學生分享吓有關社會政策等課題。

雖然忙於做義工,但阿魚亦好鍾意去旅行,退休後已去過日本、泰國同新加坡,上個月仲同太太去咗蘇梅島過二人世界,住當地嘅精品酒店,享受陽光與海灘。佢話呢個地方係個女度完蜜月後介紹畀佢哋去,當地氣氛好浪漫,今次同太太把臂同遊,實行度多次蜜月。