行政會議尋日如常開會，不過似乎冇乜爭議性嘅嘢要傾，個會開咗一個鐘多啲就完，一眾行會成員亦面帶笑容步離政府總部。問張建東5．16去邊？佢話仲未知當日會唔會喺香港，至於會唔會投票佢就冇答到。跟住落嚟嘅行會成員鄭耀棠話嗰日「可能唔喺」香港喎。

接着落嚟嘅胡紅玉同埋「金刀梁」梁智鴻，胡紅玉就估計到時佢應該喺香港嘅，但去唔去投票就到時先考慮啦！金刀梁就答得好鬼馬，竟然話：「到時話你知！」

計埋早前表明5．16唔喺香港嘅查史美倫同埋夏佳理，仲有唔知自己當日會去邊嘅楊敏德同劉遵義，即是過半行會非官守成員一係就唔知會去邊，一係就會遠走他方，呢個行會真係有隊形嘞。